كلمات مجاملة للملكة رانيا بحفل حناء كنتها رجوة.. فيديو

تداول رواد مواقع التواصل مقطع فيديو للملكة رانيا، زوجة ملك الأردن، عبد الله الثاني بن الحسين وهي تلقى كلمات مؤثرة بحفل حناء كنتها رجوة على نجلها البكر الحسين بن عبد الله الثاني.

وقالت الملكة رانيا أثناء الحفل: “أهلاً وسهلاً فيكم، مبسوطة انكم هون حتى تشاركونا فرحتنا، يعني الحمدلله اليوم كثير عزيز علينا، ولعيلتنا الكبيرة بقول: “إن ما وسعتكم بيوتنا بتوسعكم قلوبنا والفرحة وحدة. حسين ابنكم وانتوا أهله وهذا عرسكم، حسين هو فرحتي الأولى، ابني البكر وزي أي أم أنا من زمان بحلم أشوفه عريس والحمدلله اليوم بلشنا احتفالاتنا بعرسه، وإن شاء الله الله يتمم على خير”.

وأضافت الملكة رانيا: “وأخيراً صار عندي كِنة! بس مش أي كِنة ما شاء الله عليها رجوة يعني ما بعرف في أحلى أو ألذ منها العروس؟ جد غلاوتها من غلاوة إيمان وسلمى. بتذكر من أكمن شهر لمّا خبرنا حسين سيدنا وأنا أنه نوى يتزوج قديش كانت فرحتنا. رجوة هي أحلى رجاء مني لرب العالمين لحسين”.

وتابعت الملكة رانيا موجهة حديثها لكنتها: “إن شاء الله يا رب الله يسعدكم ويوفقكم ويخليكم لبعض وإن شاء الله دايماً بتكونوا سند وفرحة بعض”.

ووجهت الملكة رانيا كلمات لوالدة رجوة آل سيف: “أم فيصل، احنا عنا بنقول دايماً بتعرفوا البنت من أمها وأنا بحكيلكم الأم جوهرة، “عزة” أنا بعرف أنا كنت محلك قبل شهرين وبعرف شعورك بس بدي اطمنك إنه رجوة بعيونا وبعيون حسين وهي بين أهلها وناسها، فاطمئني عليها”.

وأضافت الملكة رانيا: “فاليوم بطلع على حسين، بشوف قدامي شاب جندي شجاع واثق من نفسه قوي، بشوف كيف يعني كوالده، بشوف كيف أسلوبه، أسلوب تعامله مع عروسته ومع عرسه، كيف حابب إنه هذا العرس يكون بمشاركة أردنية مش بس بالاحتفالات، لكن بالتحضيرات كمان”.

وختمت الملكة رانيا: “هو فعلاً شاب هاشمي واعي وعارف إنه هو منكم وإلكم، وإن شاء الله وفيت وعدي للملك حسين، وإن شاء الله يكون هو راضي، وان شاء الله كلكم تكونوا راضيين وألف مبروك النا جميعاً لأنه هاي فرحتكم قبل ما تكون فرحتنا وأهلا وسهلا فيكم مرة ثانية”.